Home
திங்கள், 25 மார்ச் 2019
பெருமையுரு!
Print E-mail

பிப்ரவரி 21 - உலகத் தாய்மொழி நாள்

தவறே யின்றித் தாய்மொழியைத்

தம்பி முதலில் கற்றிடுவாய்;

அவமா னங்கள் இதிலில்லை;

அயலார் மொழியும் இருக்கட்டும்;

 

தட்டு நிறைய இனிப்பெல்லாம்

தம்பி சுவைக்கும் உண்மைதான்;

பட்டுத் தாயின் கைபட்ட

பழைய சோற்றின் சுவைவருமோ?

 

தமிழ்த்தாய் மொழியில் கற்றுணர்ந்தே

தரையில் உயர்ந்தார் கலாமய்யா;

தரணியில் உயர்ந்தோர் பலருண்டு;

அமிழ்தை விஞ்சும் தமிழ்மொழியே

அரவ ணைக்கும் தாய்மடியாம்!

 

அவர வர்தம் சிந்தனைகள்

ஆக்கம் பெற்றே அறிவுயர

அவர வர்தம் தாய்மொழியில்

அனைத்தும் கற்றல் உயர்வாகும்!

 

தமிழே உலகில் மூத்தமொழி

தரையில் முதலாம் அன்னைமொழி

தமிழ்த்தாய் மகனாய்ப் பிறந்ததற்காய்த்

தம்பி நீயூம் பெருமையுறு!

கே.பி.பத்மநாபன், கோவை

Share