கண்கள் இரண்டும் இருக்கையிலே

கல்வி நூல்கள் படித்திடலாம்;

எண்ணும் எழுத்தும் கற்றிட்டால்

என்றும் உலகை வென்றிடலாம்!

காதி ரண்டின் வழியாய்நீ

*காசி னியினை வென்றோரின்

நீதி யாவும் கேட்டிடலாம்;

நீயும் உலகை வென்றிடலாம்!

நாவால் உரைக்கும் நல்லுரையால்

நற்சிந் தனையைப் பரப்பிடலாம்;

மேவாப் புகழின் மேதையென

மெய்யாய் உலகை வென்றிடலாம்!

கரங்கள் இரண்டும் இருக்கையில்நீ

கடின மாக உழைத்திடலாம்;

இரந்தே உண்டு வாழாமல்

இங்கே எதையும் வென்றிடலாம்!

இரண்டு கால்கள் இருப்பதனால்

எங்கெங் கும்நீ எட்டிடலாம்;

மரம்போல் நின்று மடியாமல்

மண்ணைக் கடந்தும் வென்றிடலாம்!

தோள்கள் இரண்டும் இருக்கையிலே

துணிவாய்ச் சுமையைச் சுமந்திடலாம்;

தூள்தூள் ஆகும் துன்பங்கள்;

தோல்வி யின்றி வாழ்ந்திடலாம்!

தலையின் உள்ளே அறிவிருக்க

தரையை வெல்லப் பயமெதற்கு?

மலையைக் கூடப் பொடித்தேநீ

மண்ணை வென்று காட்டிடலாம்!

இதயத் துள்ளே மனிதமுடன்

எல்லா உறுப்பும் செயல்பட்டால்

உதய மாகும் புதுவிடியல்;

உனதே வெற்றிச் சாதனைகள்!

*காசினி - உலகம்

- கே.பி.பத்மநாபன்,

சிங்காநல்லூர், கோவை