காலை நேர உறக்கத்தைக்

களைவாய் பத்தே நிமிடங்கள்;

மூலை தன்னில் அமர்ந்தபடி

முப்பால் நூலைக் கையிலெடு!

நாளும் புதிய குறளொன்றை

நன்றாய் மனனம் செய்துவிடு;

தாளும் ஒன்றை எடுத்ததில்நீ

தவறா மல்தான் எழுதிவிடு!

தினமும் ஒவ்வொரு குறளாகத்

திரட்டிக் கற்கத் துவங்கிட்டால்

மனமும் செம்மை யாகிவிடும்;

மனதுள் குறளும் பதிந்துவிடும்!

இரவில் படுக்கச் செல்லும்முன்

எழுதி வைத்த குறளினையே

உரக்கக் கூறி உருவேற்று;

உன்றன் நினைவில் தங்கிவிடும்!

பத்தே நிமிடச் சிறுவேலை;

பயனோ வாழ்நாள் முழுவதுமாம்;

முத்தே யான முப்பாலை

முழுதும் எளிதாய்க் கற்றிடலாம்!

அருமைக் குறளை அனுதினமும்

ஆனந்த மாகக் கற்றிடலாம்;

பெருமை மிக்க மாணவனாய்ப்

பீடு நடையே போட்டிடலாம்!

- கே.பி.பத்மநாபன்,

சிங்காநல்லூர், கோவை