மே-1, உழைப்பாளர் நாள்

உழவும் தொழிலும் ஓங்குதற்கு
உழைப்பே இங்கு முதல்தேவை;
சுழலும் உலகம் நில்லாமல்
சுற்றுவ தெல்லாம் உழைப்பாலே!

எறும்பு தேனீ எல்லாமே
எப்போ தும்தான் உழைக்கிறதே;
சுறுசுறுப் புடனே உழைப்போர்க்கே
சுவைகள் மிகுந்த நலவாழ்வாம்!

சிறிய வயதில் உழைத்திட்டால்
சிறந்த கல்வி பெற்றிடலாம்;
குறிக்கோள் ஒன்றைக் கொண்டுழைத்தால்
குவலயம் தன்னை வென்றிடலாம்!

மழைக்கா லத்தின் உணவுக்காய்
மணியைச் சேர்க்கும் எறும்புகள்போல்
உழைத்தே நாமும் சேமித்தால்
உலகின் பசியைப் போக்கிடலாம்!

சோம்பல் தன்னை நீக்கிவிடு;
சுறுசு றுப்பாய் ஆகிவிடு;
ஓம்பும் உடலின் பலத்தாலே
உழைத்தே நீயும் முன்னேறு!

நன்றாய் நீயிங் குழைத்திட்டால்
நாடும் வீடும் நலமாகும்;
தின்றே அழித்துத் தூங்காமல்
தினமும் உழைத்துக் களைப்பாறு!

- கே.பி.பத்மநாபன்,
சிங்காநல்லூர், கோவை