Home முந்தைய இதழ்கள் 2022 மே 2022 அறியாமை தேயும்
வியாழன், 02 பிப்ரவரி 2023
அறியாமை தேயும்
Print E-mail

பாட நூல்க ளோடு - நீயும்
படிப்பாய் பலவகை  ஏடு!
கிடைக்கும் இன்பம் அறிவு - அதில்
கிட்டும் சிந்தனைச் செறிவு!

நூலகம் சென்று படிப்பாய் - நல்ல
நூல்களைத் தேடிக் குவிப்பாய்!
உலகம் உன்னில் விரியும் - உன்
உயர்வு கண்ணில் தெரியும்!!

நாளிதழ் வாரம் மாதம் - என்றே
நன்றாகும் இதழின் கீதம்!
வாளினும்  கூர்மை  எழுத்து! - அதை
வாசிப்பாய் கண்கள் விழித்து!

சிறுவர் கதைகள் பாடல்களை - நீ
சிறப்பாய்ப் படித்திடத் தேடியலை!
பெருகும்  கற்பனை  வளத்தாலே -உன்னைப்
பேர்பெற வைத்திடும் எழுத்தாலே!

பாடத்தைத் தவிரப் பிறநூல் - எதையும்
படிக்காதே என்பவர் பதர்நெல்!
தேடியே நூல்பல கற்றால் - வாழ்க்கை
தெளிந்து ஒளிவீசும் அவற்றால்!

அறிஞர் பலரின் உயர்வு - நூல்கள்
ஆய்ந்ததால்  வந்த அறிவு!
அறிஞர் ஆக நீயும் - பன்னூல்
அறிந்தால் அறியாமை தேயும்!

- கோவி. பால. முருகு, வடலூர்

Share