Home முந்தைய இதழ்கள் 2022 ஜூலை 2022 ரோபோ
வெள்ளி, 19 ஆகஸ்ட் 2022
ரோபோ
Print E-mail

திட்ட மிட்ட வகையிலே
தேர்ந்து செய்யப் பட்டவன்
இட்ட பணிகள் செய்திடும்
இரும்பு மனிதன் எந்திரன்

நாளை உலகில் எங்கணும்
நமக்குத் துணைவன் எந்திரன்
ஆலை வேலை செய்யவும்
அமைந்த நல்ல எந்திரன்

அரங்கம் தனிலும் ஆடுவான்
அழகு நடன எந்திரன்
சுரங்கம் தனிலும் வேலையைச்
சுழன்று செய்யும் எந்திரன்

மருத்துவத் துறையில் கூடத்தான்
சிறுத்த உடம்பு எந்திரன்
திருத்தமாக அறுவையைச்
சிறப்பாய்ச் செய்யும் எந்திரன்

அணுவுலை தன்னுள் சென்றுமே
ஆக்க வேலை செய்திடும்
மனிதத் தோழன் எந்திரன்
மகிழ்ச்சி அளிக்கும் எந்திரன்

தீயை அணைக்கும் துறையிலும்
திறமை காட்டும் எந்திரன்
தீய எண்ணம் சிறிதுமே
தன்னில் இல்லா எந்திரன்

மூழ்கி ஆழக் கடலிலே
முத்துக் குளிக்கும் எந்திரன்
ஆள்கள் செய்ய முடிந்திடா
அனைத்தும் செய்யும் எந்திரன்

திங்கள் செவ்வாய்க் கோள்களில்
தங்கி வேலை செய்திடும்
அங்கே ஆய்வு செய்ததை
அனுப்பி வைக்கும் எந்திரன்

வண்ணப் பொம்மை உருவிலே
வளைந்து நெளிந்து பாடியே
சின்னக் சின்னக் குழந்தையைச்
சிரிக்க வைக்கும் எந்திரன்

கேள்விக் குரிய பதில்களைக்
கேட்ட உடனே சொல்லிடும்
ஆழ்ந்த நுட்பச் செயலியின்
அறிவு கொண்ட எந்திரன்

அறிவியல் நுட்ப வளர்ச்சியால்
அடையப் பெற்ற எந்திரன்
அறியா மை நோய்க்கெலாம்
ஆட்ப டாத எந்திரன்.


- பெரு.இளங்கோ

Share