Home முந்தைய இதழ்கள் 2019 டிசம்பர் 2019 உழவர் மதிப்பைப் போற்று!
புதன், 19 பிப்ரவரி 2020
உழவர் மதிப்பைப் போற்று!
Print E-mail

டிசம்பர் 23 - விவசாயிகள் நாள்

பசியே இல்லா மனிதர்கள்

பாரில் இங்கே எவருண்டு?

பசியை ஒழிக்கப் பாடுபடும்

பாரின் வேந்தர் உழவரன்றோ?

 

கதிரோன் எழுந்து விடும்முன்பே

கழனி தன்னில் கால்வைத்துக்

கதிரை அடித்தே உணவாக்கும்

காலம் வரையில் உழைத்திடுவர்;

 

வெயிலை முதுகில் தாங்கிடுவர்;

வீழும் மழையில் நனைந்திடுவர்;

உயிரைக் கொடுத்துப் பயிர்கள்தம்

உயிரை யேதான் காத்திடுவர்;

 

காலத் தாலே பெய்கின்ற

கனத்த மழையே அவர்க்கின்பம்;

ஞாலப் பசியைத் தீர்க்குமிவர்

நாழிக் கூழே குடித்திடுவர்;

 

உலக வறுமை நீங்கிடவே

உயிரை ஈந்தே உழைத்திடுவர்;

நிலமே அவர்தம் ஆதாரம்;

நீரே அவர்தம் மூச்சாகும்;

 

உணவை உண்ணும் நேரத்தில்

உழவர் துயரை உணர்ந்திடுவீர்;

உணவின் பருக்கை சிந்தாமல்

உழவின் மதிப்பைப் போற்றிடுவீர்!

- கே.பி.பத்மநாபன், சிங்காநல்லூர், கோவை

 

Share