விடுமுறை நாளில் வீணாய்
வெயில்தனில் அலையா தீர்கள்;
சுடுகிற வெப்பத் தாலே
சோர்வுடன் நோய்கள் சேரும்:
உடுத்திடும் உடைகள் மென்மை
உள்ளதாய் இருத்தல் நன்று;
கெடுத்திடும் பனிக்கூழ்* வேண்டாம்;
கேடிலா இளநீர் உண்பீர்:
அடுக்கடுக் காக ஆன்ற
அறிஞரின் நூல்கள் வாங்கி
விடுப்பினில் வீட்டுள் தங்கி
விரிவறி வோடு வாசி:

கெடுதலைச் செய்யா நல்ல
கனிகளை உண்ணல் நன்று;
படுப்பதும் பாயில் என்றால்
பலநலம் உண்டா கும்காண்:
விடியலில் எழுந்து சற்று
விரைவுடன் நடத்தல் நன்று;
மடியிலா தென்றும் அந்தி
மாலையில் சற்றே ஆடு:
படித்திடும் நூல்கள் எல்லாம்
பகுத்தறி வூட்டல் வேண்டும்;
துடிப்புடன் கோடை நாளைத்
தோழனே! பயன் படுத்து!

- கே.பி.பத்மநாபன்