Home 2017 அக்டோபர் பிளாஸ்டிக் தவிர்ப்போம்! பிணியின்றி வாழ்வோம்!
புதன், 21 அக்டோபர் 2020
பிளாஸ்டிக் தவிர்ப்போம்! பிணியின்றி வாழ்வோம்!
Print E-mail

உலகிற்கே பெருங்கேடு இதுதானப்பா
உடனேநாம் இதைத்தடுக்க வேண்டுமப்பா
உலகெல்லாம் நிறைந்திருக்கும் பொருள்தானப்பா - அது
உயிர்களுக்கு தீங்குதரும் நெகிழியப்பா

மண்ணிலே புதைத்தாலும் மட்காதப்பா
மரம்செடி கொடிகளுக்கும் மரணமப்பா
ஆடுமாடும் இதைத்தின்றே சாகுதப்பா - இதனால்
ஆறுகடல் குளங்களெல்லாம் அசுத்தமப்பா

எரித்தழித்தால் கரும்புகைதான் சூழுமப்பா
அதனாலே டயாக்சீன்வாயு பெருகுமப்பா
இதன்புகையை சுவாசித்தால் அய்யோஅப்பா
ஏதேதோ நோய்களெல்லாம் வருமேயப்பா

மழைநீரை நிலத்தில்நுழைய தடுக்குதப்பா
மண்ணெல்லாம் மலடாகப் போகுதப்பா
நிலத்துநீர் மட்டமெல்லாம் குறையுதப்பா - இனி
நித்தமுமே யுத்தம்தான் வாழ்க்கையப்பா

ஆயிரம் ஆண்டானாலும் அழியாதப்பா
அத்துணை உயிர்களுக்கும் கெடுதலப்பா
அதனாலே அலட்சியமாய் இருக்காதப்பா
அக்கறையாய் இதைத்தவிர்க்க முயன்றிடப்பா

பாலித்தீன் கவர்களைப் பயன்படுத்தும்
பழக்கத்தை இன்றேநீ விட்டிடப்பா
பருத்தியில் நெய்திட்ட பைகளையே
பயன்படுத்தும் பழக்கத்தை தொடங்கிடப்பா

பலசரக்குக் கடைகளுக்குச் செல்லும்போது
மறக்காமல் சணல்பையைக் கொண்டுபோப்பா
சந்தைக்குக் காய்கறிகள் வாங்கப்போனால்
துணிப்பையை விழிப்புடனே எடுத்துப்போப்பா

குளிர்பானம் குடிதண்ணீர் இவற்றையெல்லாம்
விலைகொடுத்து எப்போதுமே வாங்காதப்பா
இவையெல்லாம் அடைக்கப்பட்டு விற்பதுவோ
உடலுக்குத் தீங்குதரும் பிளாஸ்டிக்டப்பா

முடிந்தவரை இதைத்தவிர்க்க முயன்றிடுப்பா
இதன்கேட்டை நண்பருக்கும் சொல்லிடப்பா
பிளாஸ்டிக் பயன்பாட்டை விலக்கி வைத்து
இயற்கையுடன் இன்பமுடன் வாழ்ந்திடப்பா


- தமிழோவியன், தெற்கிருப்பு, கடலூர்

Share