Home 2018 ஜனவரி தமிழ்த் திருநாள்
திங்கள், 19 பிப்ரவரி 2018
தமிழ்த் திருநாள்
Print E-mail

வாழையும் கரும்பும் நெல்லும்

வயல்களில் விளைந்து வந்து

மேழியின் பெருமை சொல்லும்

மிகப்பெரும் திருநாள் பொங்கல்!

 

பாலுடன் அரிசி வெல்லம்

பருப்புநெய்ப் பொங்கல் செய்து

காலையில் படைத்து வண்ணக்

கதிர்தொழும் திருநாள் பொங்கல்!

 

காளைகள் தினமும் சென்று

கடுமையாய் உழைத்தல் கண்டு

நாளொரு தினத்தில் நன்றி

நவின்றிடும் திருநாள் பொங்கல்!

 

வேலென வேகம் கொண்டு

விரைந்திடும் ஏறு தன்னை

வாலிபர் அடக்கி வென்று

வரும்மறத் திருநாள் பொங்கல்!

 

ஏழைகள் செல்வர் என்ற

ஏற்றத்தாழ் வெதுவும் இன்றி

மாளிகை குடிசை எல்லாம்

மகிழ்வுறும் திருநாள் பொங்கல்!

 

ஞாலமும் மறையாய் எண்ணும்

நறும்தமிழ்க் குறள்நூல் தந்த

சீலரின் நினைவாய் மண்ணில்

சிறப்புறும் திருநாள் பொங்கல்!

Share